Aus: Pfluger, Elisabeth: Solothurner Geschichten: Geschichtliche Sagen, Legenden, Dorfgeschichten
Wenn me vo Bällch här Lommiswil zue chund und denn abzweigt gäge der Chilchen ufe, hed men uf der Ostsite näbem Ströösli zwo Matte mit posslige Näme: der Bluttpeter und d Dechimatt. Alt Lüt hei albe no d Gschicht dervo chöne verzelle.
Am Morge früe hed einisch e Buur vo Lommiswil uf der nördlige vo dene zwo Matte s Eemdgras gmäit. Ufsmol stoosst der Vormäder zmitts im Fäld inn uf ne blutte Maa. Dä lyt dört zämegchrugled und schloft.
«Hee, was machsch du doo?» hed der Buur dä Blüttlig aghooped. Dä isch verwached und hed mit grossen Augen umenanger gluegt, wie wenn er früsch usem Ei gschloffe weer. Es isch e Frönde gsi, und niemer vo dene Lüüte hed en könnt. Dä arm Tropf hed der Verstang verlore gha. Numen as er Peter heiss, hed er chöne säge. Wär as er sig, wöhär und wo uus, hed er nit gwüsst. Vor Chelti hed er gschnadeled mit de Zäng. Ganz durfrooren isch er gsi vom Liggen im taunasse Gras.
Die Buurelüt hei Beduure gha mit däm blutte Peter und hei uf Hilf gsinned. Uf der Matte näbedraa si Eemdschöchli gsi. I so eis ine hed me ne jetz gsteckt und guet zudeckt. Däwäg hed er chönen erwarme, bis öpper deheim es Paar Hose, es Hömmli und e Tschoope greicht gha hed, für dä guet Tscholi yzkleide.
Öb däm Blüttlig si Vergangenheit wider ufdämmered isch, woner si erwermt und ernuefered gha hed, weiss me z Lommiswil nümme. Nume di beeden Ächerli, der Bluttpeter und d Dechimatt erinneren eim no a die kurligi Gschicht.
Aus Solothurnisches Namenbuch, Band 5, Die Flur- und Siedlungsnamen der Amtei Solothurn-Lebern, herausgegeben von Hofmann-Wiggenhauser, B., Reber, J. & Schifferle, R., Schwabe Verlagsgruppe AG, Basel, 2022
Quellenverzeichnis
- Pfluger, Elisabeth. Solothurner Geschichten: Geschichtliche Sagen, Legenden, Dorfgeschichten. Illustriert von Oskar Fluri. Mit einem Vorwort von Landammann Dr. Alfred Rötheli. Solothurn: Verlag AARE, 1984. ISBN: 3-7260-0247-2. (Publikation mit freundlicher Genehmigung durch Claudia Brander.)
- Karte von Lommiswil und Selzach mit „Blutpeter“ und „Dechimatt“: Flurnamen von Lommiswil, Solothurnisches Namenbuch, Band 5, Die Flur- und Siedlungsnamen der Amtei Solothurn-Lebern, herausgegeben von Hofmann-Wiggenhauser, B., Reber, J. und Schifferle, R., Schwabe Verlagsgruppe AG, Basel, 2022. ISBN 978-3-7965-4405-7. Publikation auf Webseite gestattet von Schwabe Verlag, Liv Etienne, Vertriebssachbearbeitung| Rechte & Lizenzen, 20.02.2025