Aus Elisabeth Pfluger: Settigi Sache gids: 190 merkwürdige Geschichten.
Vom Holemeitschi
Erzählt im Jahr 1977 von Flora Kofmehl-Schaad (80-jährig) und Emma Allemann-Vogt (84-jährig) aus Lommiswil
Der Vogt Pauli ufem Schauburg hed es Jagdpatänt glöst gha und isch im Herbst albe mid sine Lommiswiler Kollege go jage. Einisch woner vom Chänelmoos här dur d Hole heizue lauft, stosst e Frau zuenem und lauft ohni ne Gruess und ohni öppis z säge mitem näbenine. Äb der Pauli si usbsunne hed, wien er mid der Frau es Gspröch wöll achnüpfe, isch si wider ver-schwunde. Soo gleitig isch si ewägg gsi, wie wenn si ines Muusloch häd chöne schlüüfe. Do isch em Pauli ersch ufgange, as das allwäg s Holemeitschi gsi isch, wo näbem gloffen isch und öppis von em häd wölle. Es hed en afo tschudere.
Vo dört aa isch der Vogt Pauli nie me znacht dur d Hole. Lieber hed er e wyten Umwäg gmacht. Nei, däm uheimlige Holemeitschi hed er nid no einisch wöllen is Revier laufe.
Au der ganz Lommiswiler Arbeiterinneverein isch einisch em Holemeitschi erbchoo. Si hei mideme Autocar en Usflug gmacht. Wo si zoben i der Dämmerig vo Selzech här d Holen uuf gfahre si, rüeft s Portme Mary: «Lueged dört s Holemeitschi!»
Alli hei umegluegt und alli heis gseh. Am Bord isch en übergrossi jungi Frau gstange, chridewyss agleit wie ne Bruut. Schön isch si gsi, wunderschön.
Der Car isch verby gfahre und alli hei gseit: «Ee aber nei au! Wie cha das au sy? Wie isch das au müglig?»
Aus Buch „Flurnamen von Lommiswil, Solothurnisches Namenbuch, Band 5“
S erlöste Holemeitschi
Erzählt im Jahr 1986 von Arnold Obrecht-Furrer (87-jährig) aus Altreu
E junge Selzecher hed z Lommiswil e Schatz gha.
Einisch woner z Chilt isch, heinem d Lommiswiler Nachtbuebe passt, für ne durezwalke. Der Selzecher isch e guete Springer gsi und hed ne chöne vertwüt-sche. Aber d Lommiswiler sinem satt uf de Färse noo-choo. Wos i der Hole s Wägli ab goht, isch der Chilter ine Haselstude gschloffe. Der vorderst Lommiswiler heds aber gseh und hed ghooped: «Chöömed! Chöö-med! Mir hei ne!» Sini Kamerade si choo und hei der Chilter wöllen umstelle. Aber do chund zu der Hasel-studen uus ganz e heitere Schyn, wo se fasch bländet. I däm Liecht stoht e schöni, jungi Frau imene chride-wysse Chleid. «En Ängel!», murmled eine. «S Holemeitschi!», seit en angere.
Wo d Lommiswiler no stöi und stuune, chund die wyssi Frau gäge se, Schritt für Schritt. Si hed beed Häng uuf und wyst se zrugg. D Burste chöne nid widerstoo. Si müese umchehre, müese dervoospringe. Si springe Hals über Chopf. Wo der Hingerst gschwing über d Achsle zruggluegt, stoht s verklärte Holemeitschi no eisder sälb und wyst se wägg.
Der Selzecher i de Studen inn hed aber vo däm allem nüüt gwahred. Ganz erstuunt hed er sini Verfolger gseh dervoospringe wie d Hase. Do isch er us der Stu-den usegschloffe und zfride heitrabed.
Vo däm Obe wägg hed der Selzecher Burst ungsorged a de Chilttage uf Lommiswil zu sim Schatz chönne. D Nachtbuebe dört hei vorem erlöste Holemeitschi soo grosse Respäkt gha, as si däm Selzecher keis Höörli me getrout häde z chrümme.
I beede Dörfer isch die Chiltgschicht nangernoo umegredt worde. «Jetz isch s Holemeitschi also erlöst!», heds do gheisse, «si Schuld isch abbüesst!» Alls hed gstuuned über die Chraft, wonem euse Herrgott jetz gee hed.
Quellenverzeichnis
- Pfluger, E. (2004). Settigi Sache gids: 190 merkwürdige Geschichten. Veröffentlichungen der Zentralbibliothek Solothurn. ISBN 3-033-00291-9. (Publikation mit freundlicher Genehmigung durch Claudia Brander.)
- Karte von Lommiswil und Selzach mit „Hole“: Flurnamen von Lommiswil, Solothurnisches Namenbuch, Band 5, Die Flur- und Siedlungsnamen der Amtei Solothurn-Lebern, herausgegeben von Hofmann-Wiggenhauser, B., Reber, J. und Schifferle, R., Schwabe Verlagsgruppe AG, Basel, 2022. ISBN 978-3-7965-4405-7. Publikation auf Webseite gestattet von Schwabe Verlag, Liv Etienne, Vertriebssachbearbeitung| Rechte & Lizenzen, 20.02.2025
- Titelbild: Erstellt mit ChatGTP am 21.4.2025