Aus Elisabeth Pfluger: Solothurner Geschichten: Geschichtliche Sagen, Legenden, Dorfgeschichten
Im Alte Züghuus z Soledurn isch mänge Fahne us de Burgunderchriege. Vier dervo si elei us der mörderlige Winterschlacht bi Nancy, wo der Burgunderherzog «Karl der Kühne» derby sis Läbe verlore hed.
S schönste vo dene vier Banner hed e junge Lommiswiler erobered und eigehändig heitreit. Das Fähnli isch e länge, zuegspitzte, silberige Sidestreife. Druff sitzt der Apostel Petrus mit de Himmelsschlüssel i der lingge Hang und eme Schwärt i der rächte. Gägem Fahnespitz use stoht uf Altfranzöisch em Burgunderherzog si Wahlspruch: «Je l’ay enprins!» – «I has gwogt!»
Vom Lommiswiler Hans Hirt weiss me nume sicher, as er als Anerkennig für si Muet us der Soledurner Staatskasse dryssig Schilling uszahlt überchoo hed. Z Lommiswil isch albe no brichted worde, er sig der Sohn vom Althüslisenn gsi. Zu däir Zyt hed men ufem Land erst afange, de Lüüte Gschlächtsnäme gee. Drum hed dä Soldat Hans Hirt gheisse.
Scho ne Rung äb dä Hansli z Chrieg zogen isch, hed er es Aug ufs Lammwirts einzige Töchterli gha. S Mareili hed ihn au nit ungärn gseh, aber numen im Verschmeukte.
Wo der Hans do däwäg mit Ehre heichoo isch, hed er em Burgunder Herzog si Fahnespruch zu sim eigede gmacht. Er heds gwogt, bi sim heimlige Schätzeli azcholopfe. Dasmol hed em s Mareili luut und dütlig joo gseit. Jetzt hei au der Lammwirt und si Frau ihrem wärte Töchterli d Liebschaft mit däm gachtede Bannerträger nümm chöne hingerhaa. Mit Böllerschüsse, Gratiswy, Chüechli und allem, was zumene rächte Dorfhochzit köört, si die zweu zämechoo. So hed das schöne Nancy-Fähnli ghulfe ne Eh stifte.
Der aschicklig Hans Hirt hed si au als Buur und Lammwirt wüsse z chehre. Er isch e gachtede Maa worde über d Dorfgränzen uus. So hed das Läbesmotto: «I has gwogt!» zwar em Burgunder Herzog Karl em Küene kei Glück brocht, aber em Hans Hirt vo Lommiswil woll.
Quellenangabe
- Pfluger, Elisabeth. Solothurner Geschichten: Geschichtliche Sagen, Legenden, Dorfgeschichten. Illustriert von Oskar Fluri. Mit einem Vorwort von Landammann Dr. Alfred Rötheli. Solothurn: Verlag AARE, 1984. ISBN: 3-7260-0247-2. (Publikation mit freundlicher Genehmigung durch Claudia Brander.)
- Titelbild: Erstellt mit ChatGTP am 22.4.2025